عندي شغف أتعلم إنجليزي، مفيش طبعا وقت للكورسات، ممكن تساعديني؟
ج/ علشان نتقن اللغة محتاجين نشتغل على كذا محور:.
الكتابة والسماع والتحدث
وكل دول محتاجين قواعد مظبوطة زائد حصيلة كلمات ومفردات لغوية كويسة.
■ بالنسبة للقواعد ..
لو حد مش متقن للقواعد وعاوز يأكد عليها تاني ممكن يبدأ بسلسلة بيسان دي موجودة على النت pdf وبتشرح بالعربي يعني ..
لو المستوى أعلى شوية ممكن يدرس حاجة في الـ grammar بالإنجلش زي English Grammar in use أو Using English Grammar
■ بالنسبة للمفردات
فيه English Vocabulary in Use ده ظريف بردو كل درس عبارة عن صفحة فيها بعض المفردات واستخدامها داخل السياق والصفحة المقابلة تمارين،
وبالمناسبة لا أحبز بأي حال حفظ أعمدة من الكلمات مقتطعة خارج سياقها لأن هذا يؤدي إلى استخدامها بصورة خاطئة فيما بعد.
كمان كثرة القراءة تعطي محصلة جيدة جدا من الكلمات .. كلما قابلت كلمة لا تعرف معناها بالطبع ستبحث في القاموس
■ وبالنسبة للقواميس
أونلاين فيه قاموس المعاني ده عربي إنجليزي أو العكس ..
وفيه قواميس إنجلش إنجلش زي Oxford & Longman Online Dictionary & Cambridge & The free dictionary online
وغيرهم كتير .. ده بيوضح لي الكلمة دي في الإنجلش بتستعمل إزاي وفي أي سياق.
ممكن تبدأ بقراءة قصص قصيرة short stories من على النت هتبقى كويسة.
■ بالنسبة لمهارة الاستماع والتحدث فهما مرتبطين ببعض بالتأكيد ..
الناس اللي مستواهم لسه مش قوي في الاستماع .. ممكن يبدأوا بحاجة بطيئة شوية زي VOA Special English
ده جزء من موقع Voice of America معمول للناس المبتدئين بحيث تسمع حاجة بطيئة شوية تقدر تستوعبها. وده طبعا باللكنة الأمريكية
فيه حاجة مشابهة بس أسرع منه شوية باللكنة البريطانية برنامج اسمه Six minute English
ده برنامج سماعي صغير مدته قصيرة بيتكلم زي برامج توك شو عن موضوعات مختلفة وفيه خاصية إنك تشوف النص مكتوب أثناء الاستماع وخاصية تحميل الملف الصوتي وكمان بيعمل ملخص لأهم الكلمات الجديدة ومعناها.
طبعا اختيار اللكنة الأمريكية أو البريطانية ده حرية تامة ليك .. وأنا عن نفسي بفضل الأمريكية.
لو عدينا المرحلة دي وبقينا تمام جدا ممكن ندخل على TED قناة على اليوتيوب فيها ناس بيتكلموا إنجلش في موضوعات كتيرة وفيه خاصية إنك تشغل الترجمة وتشوف ترجمة الكلام وأنت بتسمع بس مش كل الفيديوهات مترجمة لكن القناة مفيدة جدا.
وقناة Zamerican english على يوتيوب ممتازة هتساعدك كتير.
أ. نهى دياب
معيدة بكلية اللغات والترجمة الفورية .
تعليقات
إرسال تعليق